ភ្នំពេញ៖ ក្រសួងសុខាភិបាល ចេញយុទ្ធនាការចាក់វ៉ាក់សាំងជូនកុមារដែលមានអាយុពី៦ ដល់១២ឆ្នាំ ក្នុងរាជធានី ខេត្ត ចំនួន៤ដែលនឹងចាប់ផ្ដើមនៅថ្ងៃទី១៧ ខែកញ្ញា ខាងមុខ ខណៈ២១ខេត្តផ្សេងទៀតនឹងចាប់ផ្ដើមពីថ្ងៃទី១៨ ខែកញ្ញា តទៅ។
ក្នុងសេចក្តីជូនព័ត៌មាន ចុះថ្ងៃទី១៦ កញ្ញានេះ ក្រសួងសុខាភិបាលបានតម្រូវឱ្យកូនចៅមន្ត្រីរាជការដែលមានឋានៈចាប់ពីរដ្ឋលេខាធិការឡើង ទៅចាក់វ៉ាក់សាំងនៅមន្ទីរពេទ្យកាលម៉ែត្រ ខណៈឋានៈចាប់ពីអគ្គនាយករងឡើង ត្រូវនាំកូនចៅទៅចាក់នៅមន្ទីរពេទ្យអង្គដួង តាមកាលបរិច្ឆេទដែលបានកំណត់ ពីថ្ងៃទី១៧ ខែកញ្ញា ដល់ថ្ងៃទី២ ខែតុលា។
ក្រសួងក៏កំណត់ឱ្យ មន្ត្រីរាជការដែលមានតួនាទីចាប់ពីប្រធាននាយកដ្ឋានចុះក្រោម ត្រូវយកកូនទៅចាក់វ៉ាក់សាំងនៅមន្ទីរពេទ្យកុមារជាតិ មជ្ឈមណ្ឌលគាំពារមាតា និងទារក មន្ទីរពេទ្យគន្ធបុប្ឋា ចាប់ពីថ្ងៃទី១៧ ខែកញ្ញា ដល់ថ្ងៃទី៣ ខែតុលា។
ចំពោះកូនចៅមន្ត្រីអង្គការសហប្រជាជាតិ ស្ថានទូត បុគ្គលិកអង្គការជាតិ អន្តរជាតិ និងឧកញ៉ា ត្រូវនាំកូនចៅ ទៅចាក់នៅមន្ទីរពេទ្យកាលម៉ែត្រ ពីថ្ងៃទី៥ ខែតុលា រហូតដល់ថ្ងៃទី១៣ ខែតុលា ឆ្នាំ២០២១។
ឯកសារដែលត្រូវភ្ជាប់ជាមួយនៅពេលចាក់វ៉ាក់សាំងកូវីដ-១៩ សម្រាប់កុមារអាយុពី៦ឆ្នាំ ដល់១២ឆ្នាំ រួមមាន សំបុត្រកំណើត ឬសំបុត្របញ្ជាក់កំណើត ឬសៀវភៅគ្រួសារ ឬសៀវភៅស្នាក់នៅ ឬលិខិតឆ្លងដែន និងបណ្ណសំគាល់ខ្លួនមន្ត្រីរាជការ ឬប័ណ្ណសំគាល់មន្ត្រីជាប់កិច្ចសន្យារបស់ឪពុកម្ដាយ (ចំពោះកូនចៅមន្ត្រីរាជការថ្នាក់ជាតិ)។
នៅថ្ងៃនេះ សាលារាជធានីភ្នំពេញក៏ចេញសេចក្តីជូនដំណឹងស្ដីពីការចាក់វ៉ាក់សាំង ជូនកុមារអាយុពី៦ ដល់ ១២ឆ្នាំ ដែលមានភូមិសាស្ត្រក្នុងរាជធានីភ្នំពេញផងដែរ ដោយចាប់ផ្ដើមពីថ្ងៃទី១៧ កញ្ញាដល់ ថ្ងៃទី៣ ខែតុលា សម្រាប់ដូសទី១ ហើយសម្រាប់ការចាក់ដូសទីពីរនឹងចាប់ផ្ដើមពីថ្ងៃទី៨ ដល់ថ្ងៃទី២៤ ខែតុលាឆ្នាំ២០២១ នៅតាមទីតាំងចំនួន៤២កន្លែងទូទាំងរាជធានី។
ឯកសារសម្រាប់ចាក់វ៉ាក់សាំងគឺ សំបុត្រកំណើត ឬសំបុត្របញ្ជាក់កំណើត ឬលិខិតឆ្លងដែន ឬសៀវភៅស្នាក់នៅ ខណៈតម្រូវឱ្យមានការយល់ព្រមជាលាយលក្ខណ៍អក្សរពីឳពុកម្ដាយ ឬអាណាព្យាបាល ឬប្រធានមណ្ឌលសម្រាប់កុមារកំព្រា និងមានការអនុញ្ញាតពីមន្ត្រីសង្គមកិច្ចសម្រាប់កុមារអនាថា។
កាលពីថ្ងៃទី១៥ ខែកញ្ញា សម្ដេចតេជោ ហ៊ុន សែន បានថ្លែងនូវសារពិសេសមួយ ពីការសម្រេចចិត្តរបស់រាជរដ្ឋាភិបាល ក្នុងការចាក់វ៉ាក់សាំងការពារជំងឺកូវីដ-១៩ ជូនដល់កុមារដែលមានអាយុពី៦ ដល់១២ឆ្នាំ។ ដោយសម្ដេច បានបញ្ជាទៅអាជ្ញាធររាជធានី ខេត្ត ទាំងអស់ត្រៀមរៀបចំយុទ្ធនាការ ចាក់វ៉ាក់សាំងជូនកុមារអាយុពី៦ ដល់១២ឆ្នាំ ដែលមានប្រមាណជាង ១លាន ៨សែននាក់ទូទាំងប្រទេស ដោយថាដើម្បីឱ្យកម្ពុជាអាចមានលទ្ធភាពបើកសាលាបឋមសិក្សាឡើងវិញ៕
